1465 Con otros çiento caballeros bien vos consigra;
Id para Medina quanto lo pudieredes far,
Mi mugier y mis fijas con Minaya Alvar Fañez,
Asi como a mi dixieron, hy los podredes fallar;
Con gran honra aduzidmelas delante.
1470 Y yo fincare en Valençia, que mucho costado me ha,
Gran locura serie, si la desemparase;
Yo fincare en Valençia, ca la tengo por heredad.
[CRONISTA]
Esto era dicho, piensan de cabalgar,
Y quanto que pueden no fincan de andar.
1475 Troçieron a Santa Maria y vinieron albergar a Frontael
Y el otro dia vinieron a Molina posar.
El moro Abengalbon, quando sopo el mensaje,
Saliolos reçibir con gran gozo que faze.
[ABENGALBON]
¡Venides, los vasallos de mio amigo natural!
1480 A mi no me pesa, sabed, mucho me plaze.
[CRONISTA]
Fablo Muño Gustioz, no espero a nadi.
[MUÑO]
Mio Çid vos saludaba y mandolo recaudar
Con ciento caballeros que privado le acorrades;
Su mugier y sus fijas en Medina estan,
1485 Que vayades por ellas, adugadesselas aca
Y fasta en Valençia d'ellas no vos partades.
[CRONISTA]
Dixo Abengalbon:
[ABENGALBON]
Fer lo he de voluntad.
[CRONISTA]
Esa noche conducho les dio grande,
A la mañana piensan de cabalgar;
1490 Çiento le pidieron, mas el con dozientos va.
Pasan las montañas, que son fieras y grandes,
Pasaron Mata de Toranz de tal guisa, que ningun miedo no han,
Por el valle de Arbuxuelo piensan a deprunar.
Y en Medina todo el recaudo esta,
1495 Envio dos caballeros Minaya Alvar Fañez, que sopiese la verdad;
Esto no detardan, ca de coraçon lo han,
El uno finco con ellos y el otro torno a Alvar Fañez.
[CABALLERO]
Virtos del Campeador a nos vienen buscar;
51
|
|