345 Del agua feziste vino y de la piedra pan;
resuçiteste a Lazaro, ca fue tu voluntad;
A los judios te dexeste prender; do dizen monte Calvarie
Pusieronte en cruz por nombre en Golgota;
Dos ladrones contigo, estos de señas partes,
350 El uno es en paraiso, ca el otro no entro alla.
Estando en la cruz vertud feziste muy grande:
Longinos era ciego que nunca vio alguandre,
Diote con la lança en el costado, donde ixio la sangre,
Corrio la sangre por el astil ayuso, las manos se hobo de untar,
355 Alçolas arriba, llegolas a la faz,
Abrio sus ojos, cato a todas partes,
En ti crovo al hora, por ende es salvo de mal.
En el momento resuçiteste, fuste a los infiernos,
Como fue tu voluntad,
360 Quebranteste las puertas y saqueste los padres santos.
Tu eres rey de los reyes y de todo el mundo padre,
A ti adoro y creo de todo voluntad,
Y ruego a San Pero que me ayude a rogar
Por mio Çid el Campeador: que Dios le curie de mal;
365 Quando hoy nos partimos, en vida nos faz juntar.
[CRONISTA]
La oraçion fecha la misa acabada la han,
Salieron de la eglesia ya quieren cabalgar;
El Çid a doña Ximena ibala abraçar,
Doña Ximena al Çid la mano le va besar,
370 llorando de los ojos que no sabe que se far;
Y el a las niñas tornolas a catar.
[CID]
A dios vos acomiendo, fijas, y a la mugier y al padre espirital;
Agora nos partimos, Dios sabe el ajuntar.
[CRONISTA]
Llorando de los ojos que no viestes atal,
375 Asi se parten unos d'otros como la uña de la carne.
Mio Çid con los sus vasallos penso de cabalgar,
a todos esperando la cabeça tornando va.
A tan grande sabor fablo Minaya Alvar Fañez.
[MINAYA]
Çid, ¿do son vuestros esfuerços? ¡En buen hora nasquiestes de
madre!
380 Pensemos de ir nuestra via, esto sea de vagar;
Aun todos estos duelos en gozo se tornaran,
Dios, que nos dio las almas, consejo nos dara.
20
|
|