305 Plogo a los otros homnes todos quantos con el estan.
Los seis dias de plazo pasados los han,
Tres han por troçir, sepades que no mas.
Mando el Rey a mio Çid a aguardar
Que, si despues del plazo en su tierra le pudiese tomar,
310 Por oro ni por plata no podrie escapar.
El dia es exido, la noche queria entrar,
A sus caballeros mandolos todos juntar.
[CID]
Oid, varones, no vos caya en pesar:
Poco haber trayo, darvos quiero vuestra parte,
315 Sed membrados como lo debedes far:
A la mañana, quando los gallos cantaran,
No vos tardedes, mandedes ensellar,
En San Pero a matines tandra el buen Abad,
La missa nos dira, esta sera de Santa Trinidad.
320 La missa dicha, pensemos de cabalgar,
Ca el plazo viene açerca, mucho habemos de andar.
[CRONISTA]
Como lo mando mio Çid, asi lo han todos a far.
Pasando va la noche, viniendo la man,
A los mediados gallos piensan de cabalgar,
325 Tañen a matines a una priessa tan grande,
Mio Çid y su mugier a la eglesia van.
Echose doña Ximena en los grados delante el altar,
Rogando al Criador quanto ella mejor sabe
Que a mio Çid el Campeador que dios le curiase de mal.
[XIMENA]
330 ¡Ya Señor glorioso, Padre que en çielo estas!
feziste çielo y tierra, el terçero el mar;
feziste estrellas y luna y el sol para escalentar;
Prisiste encarnaçion en Santa Maria madre,
En Belleem apareçiste, como fue tu voluntad,
335 Pastores te glorificaron, hobieronte a laudare,
Tres reyes de Arabia te vinieron adorar,
Melchior y Gaspar y Baltasar,
Oro, tus y mirra te ofreçieron, como fue tu voluntad;
A Jonas, quando cayo en la mar,
340 Salveste a Daniel con los leones en la mala carçel;
Salveste dentro en Roma al señor San Sabastian;
Salveste a Santa Susana del falso criminal;
Por tierra andidiste treinta y dos años, Señor espirital,
Mostrando los miraclos, por ende habemos que fablar:
19
|
|